Quea storia de prima, quea sul superenaoto, semo onesti, no xe sto granché. Mi gò smesso de sogar aea sisal co’ i gà cambià ea schedina. ‘Na volta ti ‘ndavi a sanbortoo dai do veci (i gera già veci co’ gero fio, e so’ del ’37!), ea schedina gera divisa in do parti, su una ti metevi i puntini e su staltra ti ricopiavi i pronostici scrivendo uno do o ics. Po’ el vecio passava ‘na striseta sora un ruo pien de coa e gheo petava sora. Infine col righeo ben schissà te stacava ea parte che te restava a ti. Ti ghe davi ea grana…grasie e arivederci. Bei tempi andai. Ma basta ‘desso, scolta cossa che te conto.

A mi che so’ ganser in bacin Orseolo me capita spesso de no aver niente da far. Tra ‘na comitiva de foresti e n’altra me sento sua pancheta e, per passar el tempo, me meto a ragionar. Certo, preferiria fumarme ‘na paia, ma el dotor me o gà proibio…e no ‘na volta…almanco diese. No dovaria neanca bever, xe vero, ma un ciceco no pol far mal, xe n’asioma.

El tempo, disevo, eo passo a pensar, spesso anca a vose alta e i me ciapa par mato…ma mi so’ ganser e ogni ganser xe un fià mato. Ogi ragionavo su l’acqua…ti ridi?…eo so’ che xe assurdo par uno de Venexia ragionar su l’acqua…ma ti a trovi dapartuto, nei rii e in strada e quindi dime ti piutosto: come ti fa a no ragionar su l’acqua? Pensa che xe l’unica paroa che so’ scriver giusta in italian…ghe va el cicù…no ci e basta…no cù e basta. Scolta ‘desso e tasi.
Se va per acqua a Venexia.

Se tien a destra come in strada, xe vero, ma no ghe xe righe de mesadria né strisse pedonai o altri strafanici. I stasi xe e strisce, quindi anca i pedoni va per acqua…E po’ no xe vero che se tiene a destra, cò riva ‘na barca a remi se passa sora al remo…e spesso xe a sinistra che te toca passar. A sinistra po’ se va anca nel rio dei pompieri…i fioi gà da venir fora, e co’ premura…no se pol ostruir.
Anca i pompieri, quindi, va per acqua…pacifico…ti ghe rivi anca ti. Va per acqua ea Madama, ea Finansa e i Caramba…già i Caramba…i gà dee barche che par feri da stiro…se i va pian no i fa onde…i stira l’acqua e i no assa ‘na piega. Mi ogni volta che i vedo spero che i sia napoetani o siciiani…cussì almanco ghe xe a garansia che i gabia visto l’acqua….ma l’arma xe strana…xe piena de artisti che va a estro…e i xe boni a mandar in Laguna gente de Bolsan e in cambio i manda i teroni sui monti a sciar.
L’ambuansa va per acqua e cò core a tuta forsa ea fa dee onde che se ti xe in bateo ti ris-ci de svoar…sarà per queo che i gà ea sirena…per avvisar che i riva. E tuti a tacarse ai trespoi…tranne i foresti che i svoa coa Canon fracada sui oci…e i ride, i ride, cossa che i ride.
Anca el bus va per acqua…se ciama bateo, vaporeto…e signore fini dise vaporino…ma sempre bus xe.
Va per acqua i foresti, in gondoa o in bateo…e vien da rider a pensar che el meso che va più pian xe queo più caro.
Va per acqua anca i morti…via el capeo, segno dea crose e pase all’anima sua.
Va per acqua i alimenti, ea posta, i mobii, i tubi e i rovinassi…xe vero che i rovinassi va anca a pie ma sti qua xe de ‘n’altra natura.
I barconi…topi a motor i ciamemo…i fa del Canaasso ‘na tangensial…chissà che no i fassa el passante anca a Venexia. Po’ sti topi se disperde pei canai e via a sacramentar co’ l’acqua che cresse e no se passa soto i ponti. E cò l’acqua cresse besteema anca i negozianti che i vende braghe, mascare e paneti co’ l’acqua sui genoci. E i se rabia perché el Mose no xe pronto…e subito se sveia i Verdi che i se rabia perché el Mose no iò vol…e po’ toca al governo che cria sti fastidiosi…e l’oposision par forsa ribate…e no resta che ciaparsea co’ l’Europa…po’ coi americani…e aea fine xe colpa de alcaida.
Va per acqua i venexiani nel uichen, i fioi coe sbarbine e el stereo a baeton…anca i no-globa va per acqua, i va a remi iori, perché i xe ecoogisti…ma no i gà brassi, e coa giacheta de veudo che intriga, i riva al massimo in rio dea Misericordia.
Par concluder, tuti e tuto va per acqua e xe questo che ne piase…xe questo che semo…gente che va per acqua…marinai dal primo all’ultimo.
Stemo tenti, però, perché in acqua finisse anca tutto queo che svoda e case...sensa contar scoasse, maeducasion e avatrici.

Stemo tenti quindi…che altrimenti un giorno non ‘ndaremo più per acqua e ne tocarà andar sua merda.